Anyëkööl
Wël Ajääŋ ku Arek
Ɣɔnthɛɛr, köör ee cë wäth bë kɔc acam. Na raan aler ror thok, ke tiit ku ciɛm. Aciɛm yen raan thiärŋuan. Go wädït Deŋdït puöu riääk apɛi ekë cïï köör kɔc thöl liil, ku yen ee nɔŋ Wënden töŋ cɔl Ajääŋ. Go wënde cɔɔl ku yïk taŋ tök.
Go wun man taŋ tök yök aya ku lueel: “Lɔɔr manh ë nyiandië, aba lɔ nɔ̈k ë tɔŋdiënë.” Go wun Deŋdït lueel: “Ke lueth, ee taŋdië, yen abï yïn ye la nɔ̈k.”
Ku wun Deŋdït eye bɛ̈ny-bith ku wundït, wun man, eye bɛ̈ny-bith aya.
Go meth jal lɔ ke tɔɔŋ wën karou, të tɛ̈u köör thïn. Ku köör eye köör ërot waaŋ bë ya raan, ku eye nyuc dhëlic ke cë noon duut.
Na bɔ̈ raan ke kuany dhël wënic, ke yök ëcë nyuc dhëlic, ku cɔɔl raan: “Diɛɛn bär, käp ëɣɛɛn.” Na la raan bë käp, ke kɛɛc ë raan yeth ku dhoŋ yeth ku ciɛm.
Go Ajääŋ bɛ̈n, go cɔɔl: “Bär, käp ë ɣɛɛn.” Go Ajääŋ bɛ̈n ku kɛ̈p ë ciɛn tök ku muk taaŋke ë ciɛn tök. Go köör lueel: “Tääu ë tɔɔŋ piny.” Go lueel: “Kaliu.” Go köör diël ku tɛk yenhom kë bï looi.
Nawën dhiɛ̈th yenhom, ke kat bë rot la waaŋ, bë ya köör ku le rïŋ. Nawën le rïŋ bë manhtui jal bɛ̈n cam, ke manhtui bïï tɔŋ ë wun bei ciinden ciɛɛm wën muk yen tɔɔŋ thïn, yiic, ku lëk köör ë yeen, lëk thööŋ ë tɔŋ ë wun Deŋdït. Ku jɔl jäl ëmany ke la bei.
Nawën le ɣëët ë baai thok panden, ke lor man ku thiëëc: “Ca nɔ̈k ë tɔŋ ë ŋa?” Go Ajääŋ lueel: “Ka ca nɔ̈k ë tɔŋ ë wä.” Go man lueel: “Manhdië; luel wulä: ka ca nɔ̈k ë tɔŋ ë wädït. Wuur ë bɛ̈ny ku kacke aacë kuëëŋ ëlä: Na ye tɔŋ ë ŋɛk yen nɛ̈k köör ke ŋɛk anyɛɛi gɔl ë ŋɛk.”
“Lɔɔr luel wulä, Manhdie: Ke tɔŋ ë wädït, yen acï ɣɛn ye nɔ̈k. Na cɔk gɔl ë wuur nyaai, ke wuur abë lɔ̈k juɛ̈r ë kɔc paande. Ku na luel, ke tɔŋ ë wän, yen acï ɣɛn ye nɔ̈k, ke wuur anyɛɛi gɔl ë wurdït, ku lök wurdït laŋ; acïn raan lök ye muɔɔc.”
Go meth jal bɛ̈n ku lueel: “Köör aca nɔ̈k ë tɔŋ ë wädït.” Go wun rot jal jɔt ku thiëëc tiɛŋde: “Ye yic; ye tɔŋ ë wuur guöp, yen cïï ye nɔ̈k, aye taŋdië?” Go gam: “Ee tɔŋ ë wä, yen acïï ye nɔ̈k.”
Go Ajääŋ bɛn thiëëc: “Ye yic manhdië, ye tɔŋ ë wurdït, yen cïï yïn ye nɔ̈k?” Go lueel: “Ke yic, ee tɔŋ ë wädit, yen acïï ɣɛn ye nɔ̈k, wä.”
Go Deŋdït lueel: “Na cë moor yï luöm thok, ke yï tɔ̈c ë gɔl kɔ̈u alɔŋ ku ɣɛn abë tɔc ë gɔl kɔ̈u alɔŋ. Na ye tɔŋ ë wurdït, yen cïï yïn ye nɔ̈k, ke yïn abë rot jɔt nhiäk ë gɔl kɔ̈u ëtɛ̈n; ku na ye taŋdië, yen cïï yïn ye nɔ̈k, ku lum moor yïthok, ku gam, ke yïn acë rot bë jɔt nhiäk.”
Go Ajääŋ gam ku tɛ̈ɛ̈c thïn. Na ɣɔnnhiäk, ke yök ecë thou. Go raan dä jɔt ku jɔl Deŋdït cɔɔl, wën cï yen Ajääŋ tïŋ piiny ke cë thou.
Go Deŋdït lueel: “Cɔl alɔ, ee cïï man luöm thok ku gɛm.” Ku yen Ajääŋ eye wän tök keya ë mannhom. Ku jɔl wädït jääl, le nhial. Yen aruɛi ɣok ke Nhialic.
Ku jɔl man, Arek yenhom piɛɛr wei. Nawën aye dhiau, ke yöök ëlä: “Dukë dhiau, ee yïn ëlum ye thok, ŋuöt akëc thou.” Go Arek lööny dhöl, ciɛɛth alanden. Na le ɣet apuök-dhɛ̈l, cï dhël nhom puök ë diäk thïn; ke nyuc ku riic kuuc kadiäk. Ku ler thïn ku lööm tök ku piir ë dhɛ̈l tökic. Go kuöc la ku kɛ̈ɛ̈c. Go kuny dɛ̈t bɛn lööm ku piir ë dhël ë rouic. Go kuöc la kɔ̈ɔ̈c. Go kuny ye kuuc diäk jal piɛɛr ë dhël ye dhɛ̈l diäkiic. Go kuny ye kuuc diäk dhël jal kuanyic, abë rot dhiɛɛl ë kiir kɔ̈u.
Go jal lɔ ku nyuuc wär nhom ku jɔl dhiau: “Ba tem ë ŋö?” Go Monydït tɔ̈ wïïr bɛ̈n bei, mony cɔl Maleŋdït ku acɔl Awutiak aya ku lueel: “Lɔɔr dë?” Go lueel: “Ɣɛn ee raan piir ɣanhom wei, ɣɛn alɔ lɔŋtui.” Go Monydït wën lueel: “Yïn acë ben lɔ; yeŋö cë yïn rac puöu?”
Go lueel: “Ke manhdiën tökaliŋ, yen acë thou.” Go monydït bɛn lueel: “Aye meth yen wïc?” Go lueel: “Kee meth yen awiëc.” Go lueel: “Ke yï jɔl rëër, ëtɛ̈n; ku ye la wär yɔu, na yök awutiak ke ye la, ku dhuk, ke yï lɔ ku byuööcë ku däk buɔŋ ku ye amoth dak yïyɔu; ke yïn ayök meth.”
Go tiŋ wën mɔ̈u jal dhiim ku yïk monydït wën. Go monydït wën mɔ̈u dek go ye wit. Nawën le dhuk paande, wïïr, ke dhuk ke cë muöl ë mɔ̈u.
Go miɛthke jal duut ku luelkä elä: “Tik acë wäda nɔ̈k.” Go wunden jai; ku lueel: “Ka këc ɣa nɔ̈k.” Ku cɔɔl wänden tök. “Bär, lok ba kë ya cam ku të ye luöi yeen bɛ̈n la tïŋ.” Nawën abïk, ke yïk ë mɔ̈u. Gokë dek kek wun. Ku jɔl wun lueel: “Manhdië kɛ̈jë tïŋ, yen kë ya cam! Acie kërac.”
Gokë jal dhuk panden ku yekë jal lɔ bɛ̈n akölaköl, bïk mɔ̈u bɛ̈n aa dek. Go tik meth jal yök ku lueel: “Ɣɛn ajäl.” Go monydït pëën: “Yïn acë jäl; meth akɔŋ dhiëëth etɛ̈n.” Go tik jai: “Na ca meth yök, ke ɣɛn ajäl.” Go monydït lueel elä: “Apath, lɔɔr, ku na lɔ dhiëth, ke cäk wulä, riɛnke acɔl “Awutiak”. Go tik jal jääl ku ciɛth abë rot dhiɛɛl bei. Go jal thiëëc ë kɔc ë baai: “Ca meth yök ëŋöic?” Go lueel: ”Ka ca la yök kiir.” Nawën ale meth jal dhiëëth, ke ciëk ka cɔl “Awutiak”. Go kɔc dït ë baai puöth miɛt ku jɔlkë wak kiit.