Anyëkööl
Monydït kek ë Wätke
Ɣɔnthɛɛr monydït ee tɔ̈thïn kek ë wätke kadëtem. Naɣɔn akäl tök, ke cɔɔi wätke yelɔ̈ɔ̈m, ku thiëëc keek ëlä: “Cäk bɛ̈n wedhie wadëten?” Gokë gam: “Ɣok aacë bɛ̈n wadëtem, wää.” Go wunden lɛ̈k keek: “Piɛŋkä këdiën; ala wɛ̈t lɛ̈k week.” Gokë bɛ̈ɛ̈r: “Jam wäda, buk piŋ.”
Go wuden jal lɛ̈k keek, “Nyuöthkä ɣɛɛn luɔidun bäk looi aköl dä, bäk röt ŋiɛ̈c muk.” Go kaai lueel: “Ɣɛn ala puöu lɔ pan ë Bɛ̈nyŋaknhom, ba la piöc ë kuɛ̈th mïthiɔ̈ɔ̈ŋ, rïn nhiɛɛr ɣɛn tɔŋ.” Go wun lueel: “Jɔl nyuc, këdu aca piŋ.”
Ku ben ŋɛk thiëëc luɔiden bï yen rot muk. Go wën buɔth kaai cök lueel: “Rumrum ë kɔc dhëlic, yen ee luɔidiɛ̈n nhiaar.” Go wën dɛ̈t bɛn lueel: “Ɣɛn abë lɔ kek akajaakië miɔ̈ɔ̈rkië ku thäräälkië ba ya raan ë ɣɔɔc.” Go wën dɛ̈t bɛn lueel: “Wää, puɔ̈r ë dom, yen anhiaar, bë ye luɔidië.” Go wën dɛ̈t bɛn lueel: “Thäth ë wëu, yen anhiaar, bë ya luɔidië.”
Go wunden jal lueel: “Wɛ̈lkun cäk lueel ebën, aaca piŋ. Yemënë, dhuökkä ë bɛ̈ɛ̈ikun yiic ku yamkä kuɛt loiloi cäk kuany.” Gokë röt jɔt kedhie ku lek ë bɛ̈ɛ̈iken yiic.
Raan nhiar tɔŋ acë la ku rëër pan ë Bɛ̈nyŋaknhom. Nawën cë pɛ̈i karou nɔ̈k, ke tooc Bɛ̈ny ë tɔŋic, go la nɔ̈k. Go bɛ̈ny raan tuɔɔc tenë wun, bë thok bɛ̈n lɛ̈k yeen. Go monydït thok piŋ ku lueel: “Ke cïï wëndië lueel wäär, lɔn nhiɛɛr yen tɔŋ; ku yemënë, acë ariöp kɔc nhiar tɔŋ jal yök.”
Raan ë cuär, acë wëu ë kɔc kɔ̈k la kual, go dɔm thïn ku näk. Go wɛ̈t lueel tënë wun. Go wun lueel: “Ke cïï wëndië lueel wäär, lɔn nhiɛɛr yen cuëër, ku acë ariöp raan nhiar cuëër jal yök.”
Raan ë kɔc rum acë jäl, ku le thiaan dhëlic, ku dhël ee të ye kɔc ë ɣɔɔc tëëk thïn. Gokë rɔ̈m kek ë raan dɛ̈t ril, go thou yök thïn? Go thok bɛn bɛ̈ɛ̈i tënë monydït. Go lueel: “Ke cïï wëndië lɛ̈k ɣɛɛn wäär lɔn nhiɛɛr yen ruööm ë kɔc dhëlic, ku acë ariöp raan kɔc rum jal yök.”
Ku jɔl raan ë ɣɔɔc rot jɔt, ku jɔt wëu ë thäräälke kɔ̈ɔ̈th ku akajaake ku miɔ̈ɔ̈rke, ku leer tëmec ë gen dɛ̈tic, bë la ɣɔɔc ë käŋ. Nawën le dhuk, ke yök cuɛ̈r ku riŋkë yeguöp ku näkkë, ku nyɛɛikë wɛ̈uke ku käŋ ebën. Go thok bɛ̈n tënë monydït. Go lueel: “Ke cïï wëndië lueel wäär lɔn nhiɛɛr yen ɣɔɔc, bë wëu juëc ayök thïn. Ku yemënë, acë ariöp yök, ariöp ë kɔc nhiar wëu apɛi.” Ku acë döŋ ë mïth karou, raan ë puör ku raan ë thäth. Na cïk run karou lɔ̈k nɔ̈k, ke cɔɔl wunden yelɔ̈ɔ̈m ku lueel: “Ye wek cë döŋ waarou, luɔidun ye luɔI ŋö?” Go raan tök rot jɔt ku lueel: “Wää, kɛ̈c lɛ̈k yïïn wäär lɔn nhiɛɛr ɣɛn puör ë dom?” Go wun bɛ̈ɛ̈r: “Ɣɛn acë puöu la yum tënë yïïn manhdië, yïn acë këpath kuɛ̈ny bei, bë ya luɔidu. Bär jɔl nyuc, yïn apel nyin.”
Ku jɔt manh dɛ̈t rot ku lueel: “Kɛ̈c lɛ̈k yïïn wäär lɔn nhiɛɛr ɣɛn thäth ë wëu?” Go wun bɛ̈ɛ̈r: “Luɔidun yen apath, abë yï muk apath, yïn apel nyin. Na cä thou, ke week aabë röt ŋiɛc muk, wek wämuuth. Ku aköl dä, le Nhialic wek muɔɔc ë diäärkun ku miɛ̈thkun ke we piööc miɛ̈thkun ë luɔidun.”.
Wɛ̈t ë monydït kek ë wätke akan.