Anyëkööl
Anyïköl ë dhiënh cɔl Patɛk
Wäärthɛɛr, bïï kɔc ciëën, kɔc aake ye dhiënh tök ebën. Nawën ke piɛ̈ɛ̈t wun dït apɛi ku dhiëëth aake rɛ̈ɛ̈r ëtök. Na le tik tak, ke lëk tiŋ miacde: “Ɣɛn arɛc wun dït ebën bë yeyic tek bë kɔckä rëër ëröt ku rɛ̈ɛ̈r kɔckä ëröt.” Go tiŋ miacde lueel: “Makäi! Duk ben lueel: ‘Kën ee wɛ̈t rac.’” Go tiŋ miacde wën lueel: ”Kapath.”
Na ɣɔnakɔ̈u lek tɔ̈c ɣöt ke Muɔnyde, ke lueel: “Ɣɛn acï wën ë Teek mak piny.” Go Muɔnyde piŋ ku bït. Na ɣɔn-nhiäk la piny bak, ke muɔnyde kɛ̈ɛ̈c bei ku lööm kɔ̈nde tu taaŋke ku wɛ̈r kɔc gup, kɔc yï Teek.
Go raan tök dɔm ku lueel: “Ye kën ŋö cë rot looi?” Go mony wën lueel: “Päl ɣɛɛn ku kɔŋ ɣa tïŋ nyin.” Ku jɔl le manhtui tïŋ nyin; go tïŋ ke cë puöu riääk apɛi dït, go puɔ̈l bë lɔ.
Ku jɔl riŋ kɔc gup, yen mony tïŋ wën, cɔl Ariääth Makuëndït ku jɔl kɔc röt nɔ̈k kamken. Nawën la tɔŋ thiök, ke ŋɛk ye jääl ku le nyuc ërot ku nyuc ŋɛk ërot, kek kɔcken nhiar yeen. Nawën la Patɛk jääl, ke tiɛŋden tök jal liëc ë mïth karou. Nawën le dhiëth, ke dhiëth nyaŋ ku meth.
Go nyaŋ jal ɣäth wïïr ke nyɔk ku luelkä elä: wek aacuk tek yïïc ë nyɔk, bë nyaŋ arëër wïïr ku ye yanhda. Yen ee tɛ̈n ë jiël dhiënh cɔl Patɛk thïn akan.