Anyëkööl
Kɔc cï Weŋ kɛ̈ɛ̈k
Wäärthɛɛr, Wɛ̈tkui aake cë lɔ kɔ̈ny ë ɣɔ̈k Malual, goke lɔ luɔ̈ny daau karou. Na lek dhuk panden, ke bï cɔk bɛ̈n nɔ̈k dhëlic apɛi. Go raan tök lueel: “Mäthdië, näkku wɛŋ tök buk cuet, ku wɛŋ tök abuk la tek, ba naŋ weŋ nhom ku ɣɛn ke dɔu, të le yen dhiëth aköldä.” Go mäthde lueel: “Ei, ɣɛn acë wɛŋdië näk.” Go monytui bɛn lueel: “Muɔɔny, weŋ aye kɔ̈ɔ̈ny ku raan acie kɔ̈ɔ̈ny.” Ku le thïn ku nɛ̈k wɛŋde ku tir ku cuet abak, ku muɔɔc mäthde. Go mäthde jai ku lueel: “Yïn abä bɛn buɔɔth të thiëëp ɣɛn rïŋ ë wɛŋdu.” Go lueel: “Kapath, mälë.” Go amëjoŋ bɛ̈n ku nyuuc ë wɛi yïc, go mony awën cë kuec ë rïŋ biökic, ku nyop ku cuet. Go mony awën cë wɛŋde nɔ̈k tïŋ ëpath ku bit.
Nawën lek ɣet bei, ke näk run kadiäk; ku cë wɛŋ guɔ dhiëth. Go mony wäär cë wɛŋde nɔ̈k bɛ̈n ku lueel: “Cuk weŋ tek?” Go monytui lueel: “Ca muɔ̈l?” Go mony awën lueel: “Ɣɛn akëc muɔ̈l.” Go monytui lueel: “Jɔt rot, jälë emënthiin, acie yïn yï mac amëjoŋ.” Go mony awën lueel: “Ka cë path, na ce wɛi ë wɛŋdië, diëd yï cë amëjoŋ yök tɛ̈no?” Go monytui puöu riääk ku lueel: “Na cï jäl, ku lɔ̈k yï la ŋuaanyŋuaany etɛ̈n, ka ba tïŋ alä.” Go mony awën lueel: “Na ye keya, ke yï bär lok bäny nhïïm. Kën amëjoŋdiën acä pälic.” Go kë lɔ, ku lueel: “Ɣok aa tek weŋ ɣok mony kënë, wek bäny.” Go bäny lueel: “Weŋ yïndë?” Go lueel: “Ɣok aa ɣo cë lɔ kɔ̈ny Malual, go ɣo lɔ luɔ̈ny daau karou. Go cɔk ɣo bɛ̈n nɔ̈k dhëlic apɛi, buk duɛ̈r thou. Guɔ lueel: ‘Cuetku wɛŋ tök ku ɣok aabë wɛŋ tök lɔ tek’. Go monyë jai. Guɔ wɛŋdië nɔ̈k ɣɛndiën mɛɛn. Ku miaac ë rïŋ, go jai ku lueel: ‘Yïn aben ɣa buɔɔth aköldä.’”
“Go amëjoŋ bɛ̈n ku nyuuc ë wɛi ë wɛŋdië yic. Go curic/biökic ku nyop ku cuet, ku jɔl wɛŋde bɛ̈ɛ̈i. Kënë, yen awïc ɣɛn yen buk weŋ tek. Ërin, ee wɛi ë wɛŋdië yen abïï amëjoŋ.” Go bäny jal lueel: “Këde ee yic; yïn adhil mony yiɛ̈k dɔu.” Go monytui jal gam ku yïk dɔu.
Yenakan.