Kɛ̈ŋ ë Jiëŋ
Kääŋ ye kën ŋö?
Kääŋ ee wɛ̈t tëdä aa wël thii ciek yiic, ye nyaai anyikölic. Yen ee wɛ̈t cuai, wɛ̈t lagöi naŋic kën ë kɔc wɛ̈ɛ̈t bë ŋɛk piëërde cɔ̈k piny apath. Raan ŋic kɛ̈ŋ ee käjuëc tiaam ë piëërde yic. Ku ee wɛ̈t ŋic yen kɛ̈ŋ. Cït mën wën cï ɣɛn ye lueel; ëlä, kääŋ ka anyïköl cë rot kaŋ luöi raan dä, kë cë rot looi tënë raan dä, aye raan dä piöc thïn. Raan ŋic kɛ̈ŋ ee nhom lääu ku ee rëër ke tïr puöu ë kuat këriëëc ebën yic. Kɛ̈ŋ aa wël kɔc wɛ̈ɛ̈t bë raan cï la kërac yic ku aa kɔc duööt puöth bë raan kërac guum.
Kɛ̈ŋ ë Muɔnyjiëëŋ aa kuöt yiic apɛi. Ala kɛ̈ŋ athiɛɛi, cëmën ë miɛt ë guöp ku duaar, ku kɛ̈ŋ ë raan duööt puöu ba atɛrku guum, ku kɛ̈ŋ ë biökruɛl, ku kɛ̈ŋ ë kɔc nyuöth ŋiɛc rëër. Ku kɛ̈ŋ ba ke ya gɔ̈t ë jarida kën yic, aa bë yiic naŋ kɛ̈ŋ ë Col ë Muɔŋ kek kɛ̈ŋ kɔ̈k cï kɔc kɔ̈k nyäŋ ë piny nhom.