Kɛ̈ŋ ë Jiëŋ
Kɛ̈ŋ aa cë gɔ̈t bïk kɔc mec kek ë ciɛ̈ŋden piɔ̈ɔ̈c ë pïïrden ë yiamic.
Muɔɔr ë tik rɛc käkke cɔl ke aa ye kälei
Wɛ̈tde yic: Tik, na cë kɛ̈ɛ̈k kek muɔnyde, ka wel akɛ̈ɛ̈k bë ya tiɛ̈ɛ̈l kamken kek moc. Ku tiɛɛl deenë, aye yen kuat kë looi moc ebën maan. Cɔk a kë looi muɔnyde, ke ye kë bë piëërde cɔ̈k piny, ka cï ben gam.
Piny awëër ë dɔl
Wɛ̈tde yic: Raan ril yakölë ku raan mit puöu ku raan jak yakölë, alëu bë dɔl, ku raan niɔp yakölë ku raan rac puöu ku raan ŋɔ̈ŋ yakölë, alëu bë biɛt, ku na nhiäk, ka ben dɔl, të le kä jör keek ë piëër denic röt waar. Du ye ŋaŋ tënë kɔc tɔ̈ kärac yiic.
Luɔikä röt cëmën ë guäräk, ye yen tuŋ dhuök padhiapde
Kääŋ kën aye lueel ë kɔc cï panden riääk bïk thiëi roor ë läk nhïïm, wɛ̈t ye kek kääŋ kën lueel, ee rin bïk nhïïm cuk mär tënë dhiëëth keek thin. Na kuc kä röt looi, ka mär ku na ŋickä röt looi, ka dhuk panden aköldä. Cëmën län dït cɔl akɔ̈ɔ̈n, na cë dhiɔp, ka dhuk padhiap läi.
Adëcjöök cɔl wëët aye lɛ̈t
Raan kuc wël, ku cɔk lɛ̈k yic, ka wel bë ya lɛ̈t yen cï yen lat. Ku ee yiny dït lagöi. Kääŋ kën aye lueel të cï raan jai ë yith.
Nyinpɛl acɔl man nyëriääk
Käk ye lööm ë ruëëny aa cie kot ku aa wɛɛr, ërin aa käk ke löm ë nyinpɛl. Käk adɔ̈cku aa döcku, aa naŋ yiic athɛ̈ɛ̈k tënë kɔc ŋic keek lɔn ye kek adɔ̈cku. Kääŋ kën aye lɛ̈k mëruëëny ku kɔc kɔ̈k kɔc wet ë lueth.
Acë ciën ciɛɛŋ
Udɔk ee ye raan Jurman-Aŋɛ̈ɛ̈r. Jurman-Aŋɛ̈ɛ̈r ee wut ku atɔ̈ alɔŋ Rek. Yen awec akeu kek Apuk ë Giir ë Thïïk ku Lɔu Ariik Mawiën ku jɔl ä Nuɛ̈ɛ̈r.
Raan cɔl Udɔk ee cë thiëëk ë tiɛŋde ku aa cë panden keer ku dhiëthkä miëthken ku ɣɔn thiɛɛk kek röt kek tiɛŋde, aa ke nhiar röt apɛi dït. Udɔk ee thek tiɛŋde ku yen lan ë tik, ee thek Udɔk aya.
Nawën lek rëër ë run lik diäk, ke nhiär yäi kamken kek ë tiɛŋde. Go athɛ̈ɛ̈k ku riɔ̈ɔ̈c ë guöp liu ë kamken. Ku na liu athɛ̈ɛ̈k kam tik ke moc, ke wël ë ciɛɛŋ aa nyɔl, yith ku lɔɔc ku athɛ̈ɛ̈k, keek aa mëën ë ciɛɛŋ. Ërin yith, kek aa ye tik ku moc panden ŋiɛc cieŋ. Ku yith, keek aa lɔɔc ku athɛ̈ɛ̈k tënë moc ku tik ku jɔl aa mïthken cïk dhiëëth.
Ke kën ë cë rot looi kam Udɔk kek tiɛŋde, yen lueel yen kääŋ tɔ̈ nhial, akïn: ɣɔn akäl tök, tiŋ Udɔk ee cë kuïn thaal. Nawën ke jɔl aduuk rec; aduuk ë miëthke; mïth ë nyïïr ku mïth dhäk ku aduäŋde aya ku liu aduäŋ ë Udɔk thïn. Go jal pɛ̈k wei ku le yic gɛi: “Maɣei! Manhdië, kaat diëc aduŋ ë wuur; acä muör nhom.” Ku Udɔkdït ee rɛ̈ɛ̈r macthok apïŋ ku adaai këloi röt ebën.
Nawën le piŋ lɔn cï aduäŋde kɔc muör nhïïm. Ke lueel: “Acë jal ciën ciɛɛŋ, të ye yen aduäŋdië; ɣɛn Udɔk, yen kɔc jal muör nhïïm.” Kënë yen acë jal döŋ ke ye kääŋ ye röör lueel gut yaköl.
Na benku kääŋ lööm buk thɔ̈ɔ̈ŋ kek të ciëŋ röör thïn kek ë diäärken yakölë, ke kääŋ Udɔk ee yic. Ku ben käk Udɔk ŋuɛ̈ɛ̈n amääth. Ërin yen ee këc cuɔp wei miëthke yiic. Ee miɛ̈th, yen acë pɛ̈n yeen. Tɛ̈tdä, ke tiɛŋde yen acë nhom dhiɛl määr, ërin cï yen puön bɛn pɛ̈k wei ë wɛ̈t cï aduŋ ë muɔnyde ye muör nhom.
Kë ye ɣok Udɔk bɛn ŋuun, ee ciɛɛŋ cï diɔ̈r bɛ̈ɛ̈i bei yaköle. Ciɛɛŋ ye keek muɔc cuɔp wei baai ku döŋ tik bë tɔ̈nyde lɔ̈k acam ërot kek miëthke. Ku mɛ̈r nhom tërɛɛc ɣɔn dhiëëth yen mïthkä thin kek monyden ye jal cop yaköle. Acïn ciɛɛŋ cït kënë, ë ciɛɛŋ kuat cɔl Muɔnyjäŋ yic. Neŋ tiŋ cë kaŋ thaac bë ruän ë nyaande kueen, aneŋ tiŋ cë kaŋ nyuc bë ruän wënde kueen? Aliu, akëc rot kaŋ looi ë ciɛɛŋda yic. Ku aŋot buk jäl tïŋ, yen të bï ciɛɛŋ kën nhom la guut thïn kek diɔ̈r cë röörken cuɔp wei ë bɛ̈ɛ̈i yiic!
Nyin pɛl acɔl man nyëriääk
Wɛ̈tde yic: käk ye looi ë ruëëny ku pɛl ë nyin, aa cïn yiic käpath. Kärɛc ye ke luɔ̈i kɔc kɔ̈k, aa röt bɛ̈n dhuök yïïn, aköl le ruɛ̈ɛ̈nydu ŋic. Ërin ruëëny ee rïïr, ku rïïr ee luɔi rac ye mëruëny luɔ̈i abäŋ. Abäŋ ee kuat raan ë jam yic ku ciɛth ë dhɛ̈l tök yic. Na jɔl abäŋ thɔ̈ɔ̈ŋ kek mëruëny, ke yïn ayiök abäŋ ye raan lacök ku anɔŋ ciɛɛŋ path. Këtöŋ dak tënë yeen, ee wɛ̈t ye yen nhom kuɛɛk tɛ̈ntök. Abäŋ akuc lɔn adë, käŋ aa ke yiic bɛ̈n waar. Na bɛn mɛ̈ruëny caath ku tïŋ, të ye yen käkke luɔɔi thïn, ka go guɔ ŋic lɔn yen cuär ku alueeth. Acïn këpuɔɔth ye mëruëny tak ke ye këpath. Yen ee rot cɔl aye raan path, aŋic wël ku aŋic käŋ looi. Kën ebën, ee lueth, Kuat këlooi ku këlueel eben,, ee kën ë këde, kë bë yiök thïn; yen aye wïc yetök.
Ke wek kuatda, mëruëëny aa rɛc ciɛɛŋda ɣo daai. Aa cë ɣo pɛ̈n pïïr path. Ku aa cë rëër rac kɔc puöth ebën. Mëruɛ̈ɛ̈ny aa nɔŋ yiic diäär ku röör. Tiëŋkä keek ku dɛtkä ke gup apath. Ku yakä wɛ̈lken ku luɔɔiden muk nhom apath. Mëruëëny aa röt ruëëny kamken, të cïn yen abäŋ dɛ̈t cïk bɛn yiök bïk ruëëny. Bɛ̈i aa cï ruëëny rac ɣocin. Mïth ke bïï etɛ̈n, bïk bɛ̈n piöc, bïk aa kɔc aköl rial, aa cï ruëëny cuɔp wei ë bɛ̈i yiic. Ku döŋku ɣo nyam ɣothook. Ku acïn kë dir awätyɔ̈l ku ayälyɔm. Aa keek aa cë röt wel bïk aa lɔɔc. Kuat abäŋ aa jal daai, të diërkä läärken. Ku apath bïk kääŋ kënë kueen bïk deet yic apath.