Agamlöŋ Online

Ŋanykudɔt atɔ̈ wär yɔu acath dɔt-dɔɔt ë dɔt-dɔɔt.
Ŋanykudɔt atɔ̈ wär yɔu alïm dɔt-dɔɔt ë dɔt-dɔɔt.
Ŋany akuëën käŋ agɔ̈r yɔu acath dɔt-dɔɔt ë dɔt-dɔɔt.
Ŋany ë rot waaŋ, ee wal ku tiim kuɛ̈ɛ̈n dɔt-dɔɔt ë dɔt-dɔɔt.

Aca aruɔ̈r kuɛ̈ɛ̈n go rot waaŋ bï ya maŋök.
Aca aciɛ̈c bɛn kuɛ̈ɛ̈n go ŋot ye maŋök go nhiaar.
Acï la ku tɛ̈ɛ̈c liɛt yic agör go rot waaŋ.
Acï rot waaŋ bï ciët raan thith go puɔ̈u la yum-yum.

Ŋany acï liɛt yök, ke lir thuat, liɛt pïu thook.
Ŋany acï liɛt yök, liɛt pïu thook, liɛt ciaam.
Liɛt pïu thook, liɛt ciaam, na cɔk liɛr ka cin këcam.
Liɛt ciaau, na cɔk liɛr ka cin käcam käm lim alïu.

Ŋanykudɔt akuëën agala, acath dɔt dɔɔt ë dɔt-dɔɔt
Ŋany adhuk agɔ̈r nhom dɔt-dɔɔt ë dɔt-dɔɔt.
Ŋany acï dhuk agör nhom dɔt-dɔɔt, go rot waaŋ.
Ŋany acï rot waaŋ, go rot tïŋ kɛcït raan col.
Acï gäi kïnden yam, kïn agör nhom, kïn col.
Acï gäi kïnden yam kïn col, go puɔ̈u la yum-yum.
Acï nhiaar bï rëër agör nhom käm lim ajuëc.
Rëër aɣer agör nhom apath ka deep thok ajuëc.
Rëër aɣer agör nhom aŋuɛɛn anyil ku käm cï nyai ajuëc.

Ŋany acï la cäm-cäm awïc këɔɛm dɔt-dɔɔt ë dɔt-dɔɔt.
Ŋany acï la dëŋ-dëŋ kam liɛt kek agör nhom la yic käcam.
Ŋany ace la cäm-cäm kamken ee ciɛɛŋde ee ciɛɛŋde.
Acï nhiaar bë la dëŋ-dëŋ keya ee ciɛɛŋdë ee ciɛɛŋdë.

Yen akan tiëŋkë Ŋany kan.
Yen akan buɔ̈rkë Ŋany kan.
Yen akan wuɔ̈kkë Ŋany kan.
Yen akan dɛtkë Ŋany kan.
Yen akan atïïk akan.
Yen akan aliëp kït akan.

Ŋanykudɔt acï määth kek Alïïk.
Ŋanykudɔt acï määth ke Buɔl.
Ŋanykudɔt acï määth ke kek bïk yen akony aköl ku wɛ̈ɛ̈r.
Tiëŋkë kek, dɛtkë kek apath, acie diɛt acie läi.
Tiëŋkë kek, dɛtkë kek apath, acie luɔ̈ny acie läi.
Tiëŋkë kek, dɛtkë kek apath, acï la liäp-liäp.
Tiëŋkë kek, dɛtkë kek apath, aliëp week.
Tiëŋkë kek, dɛtkë kek apath, aacï kenhïïm gäk.

Col akɔ̈l, lööny akɔ̈l piny, agon-gon Alïïk akan.
Col akɔ̈l, lööny akɔ̈l piny, aguat-guät Alïïk ɣööt thook.
Col akɔ̈l, lööny akɔ̈l piny, agon-gon Alïïk kɛm bɛ̈i.
Col akɔ̈l, lööny akɔ̈l piny, agon-gon adït käcam awïc.

Ŋany tïŋ ɣɛn apath ɣɛn ee dit ku ɣɛn ee raan.
Tïŋ ɣɛn, ɣɛn ee diɛ̈n raan la thïn dhiɛ̈th mïth.
Ɣok ɣɛn apath, ɣɛn ee diɛ̈n raan ke gök ɣɛn alïu.
Ŋany loi ɣɛn apath, ɣɛn ee diɛ̈n raan, luɔide aŋiɛc.
Ŋany tïŋ ɣɛn apath, ɣɛn ee diɛn raan ŋic ciɛɛŋde.
Ŋany tïŋ ɣɛn apath, ɣɛn ee mony cin ke ric ɣɛn.
Ŋany loi ɣɛn apath, ɣɛn ee diɛ̈n raan, luɔide aŋiɛc.
Ŋany ɣɛn ee raanden, manhden, manh nyanden.
Ɣɛn ee raanden, manh nyanden löŋ aya gam.
Ɣɛn ee giɛr. ɣɛn ee thel ciɛl të gääl alïu.
Ɣɛn ee giɛr, ɣɛn ee giŋ, manh nyanden ŋic panɛ̈ɛ̈rda.

Ŋanykudɔt acï la cäm-cäm anɛk ciɛɛc.
Ŋany acï la dëŋ-dëŋ kam liɛt kek agör nhom anɛ̈k ciɛɛc.
Ŋany acï la liäp-liäp kam kït anɛ̈k ciɛɛc.
Ŋany anhiar kïn col, na nhiäk bak ke puɔt arop thith.

Yen akan tiëŋkë Ŋany kan.
Yen akan buɔ̈rkë Ŋany kan.
Yen akan wuɔ̈kkë Ŋany kan.
Yen akan dɛtkë Ŋany kan.
Yen akan atïïk akan.
Yen akan aliëp kït akan.

Buɔl acï la thur bei.
Buɔl akan adöt Alïïk.
Buɔl acï la kïc piny käŋ atëër.
Buɔl abɛn yekɔu käŋ athök käŋ atëër.
Ŋanykudɔt. ɣen apuɔl, ɣɛn ee yom.
Ŋany ɣɛn ee yom, anër aliu, këmec acuɔp.
Ŋany ɣɛn ee yom aköl ku wɛ̈ɛ̈r amat kek.

Ɣɛn ee matɛɛm, caath athör thɛɛr, tïŋ ɣa riööp.
Ɣɛn ee matɛɛm, kam läi ku luɔny, tïŋ ɣa riööp.
Caath athör, tïŋ athör thɛɛr, aya riääc, tïŋ ɣa riööp.
Caath athör, tïŋ athörku, ɣok aacie gääl, tïŋ ɣo riööp.
Caath athör, tïŋ athör thɛɛr, tuɔ̈ŋkië aril, aya riääc.

Acïn lan bë wɛtdu dhɔl, acïn lony bï pïr yïn.
Acïn lony ku lan bï wɛtdu thɔl, gam ɣɛn buk wël amat.
Läi ku luɔny, amat tëtök, ba kek waaŋ, kiɛ̈ndu anhiaar.
Läi ku luɔny yicök, ku watke kenhïïm, kiɛ̈ndu anhiaar.
Kek ëbën abï buɔɔth raan yec aliu kiɛ̈ndu anhiaar.
Matku kek bïk wɛtdu gam ku wäŋ kek kiɛ̈ndu anhiaar.

Keek aa kak Buɔl akan kek Alïïk.
Tiëŋkë kek dɛtkë kek kɔc thöl kɔc akak.
Tiëŋkë kek cuɔckë kek kɔc thöl ɣook akak.
Tiɛ̈ŋkë kek dɛtkë kek ŋiɔckë keyïth.
Tiëŋkë kek dɛtkë kek acie diɛt acie läi.
Tiëŋkë kek dɛtkë kek apath acï kenhïïm gäk.

Acï guɔ bɛn, wun baai acï la ciel.
Acï la ciel, Makuɔc wun baai acï la ciel.
Buɔl acï gäi, abiök wut, Gum-ater acï la ciel.
Buɔl acï riɔ̈c, abiök wun baai acï la ciël.
Acï la yir-yir wei, tuŋ-tuŋ wäär ayïth.
Alïk-alïk but kan, abiök wut, Gum-ater acï la ciel.
Ŋanykudɔt adëŋ ariik, tuɔl thɛɛr aa thiɛ̈ɛ̈t.
Ŋanykudɔt acie nyuc yuek anyuɔp wei.

Ŋic kuatdu duk rot ee waaŋ cï Ŋanykudɔt
Duk la liäpliäp, duk yɔm buɔɔth cïmën Alïk ke Buɔl.
Na ye yom buɔɔth ke yïn acie raan gïrïm.
Na loi keya, ke yïn acie raan gïrïm, adɔ̈ɔ̈c kuat thɛɛr.

Yïn aca Alïk mayic, ku Alïk mayïc acie yïn.
Yïn acie Buɔl malïth, ku Buɔl malïth acie yïn.
Yïn acie Ŋanykudɔt, ku Ŋanykudɔt acie yïn.

Dut Anyakdït