Agamlöŋ Online

Yom dït tet acï rɔt jɔt apɛi.
Yom dït tet acï rɔt jɔt abiök apɛi.
Yom dït ë mɛ̈i acï rot tuk arämwër abiök apɛi.
Yom dït ë mɛ̈i acï gir wiɛɛi awiët apɛi.
Acï rot tuk apɛi tooc ku riɔ̈ŋ kɔ̈ɔ̈th.
Acï rot jɔt apɛi, acï rot wiɛɛi të cïn yic tiim.

Yom dït ë mɛ̈i aril apei acï gir wiɛɛi.
Yom dït ë mɛ̈i ë tiim cïn mei ril nyuɔ̈n cök.
Aye nyuɔ̈n cök ku piirkë wei.
Aye nyuɔ̈n cök ku dhoŋkë kɔ̈th.
Na ye tim dɔk, tim la mei ril,
Na ye tim dɔk, tim la mei ril, ku cɔk nyuɔ̈n cök.
Na cɔk nyuɔ̈n cök, ka gut yekɔ̈ɔ̈m piny, ku jɔt yenhom.
Na ye tim dɔk, tim la mei ril ku cɔk wiɛt piny ka jɔt yenhom.

Gir yak thok ee tɔr wiɛɛi aril apɛi.
Gir yak thok aril apɛi ee bɛ̈n dhɔŋ tiim.
Gir ee bɛn dhoŋ tiim aguɔ ariɔ̈c yic ŋɛɛr.
Gir ee bɛ̈n dhoŋ tiim aguɔ ariɔ̈c yic ŋɛɛr ariiŋ wëi wei.
Gir yak thok aril apɛi.
Abiöŋ kɔ̈c puɔ̈u kuc piny kuaath.

Raan la abiöŋ ril acie diɛɛr.
Raan la abiöŋ tïr puɔ̈u ku cɔk gir tïŋ acie diɛɛr.
Raan la baai, ŋic ee yɔm kënë acie diɛɛr.
Wun baai ŋic të ye yom buɔk thïn acie diɛɛr.
Wun baai acie diɛɛr, ee yom thɛɛr buɔk run ku yuɛɛn piny.
Ee yom gir tuk tëɣɔn ku ŋot yuɛɛn piny cï many awai.

Gir acï war kuandït guuŋ thɛɛr ku yiënkë thïn.
Acïk guuŋ ku yiënkë thïn abïk nyïn la kïrkïr.
Wär kuandït akëc nyïn thiäŋ tɔr ku kɛtkë.
Akëc nyïn thiäŋ, ku kɛtkë ŋuɔ̈t ɣok aliu.
Yom rot jɔt ara'mwër akëc wär kuandït kaŋ kuaath.
Yom akëc war kuandït kaŋ kuaath, yen ala ɣook.

Duɔ̈kkë riɔ̈c, na cɔk tɔr wieei ka ŋot bë kɔ̈ɔ̈c.
Duk mɛnhkui pɛ̈l wei bï yom kuaath.
Duk manh moor pɛl wei yom abï kɔ̈ɔ̈c.
Dɔm mɛnhkui ku kääckë gir aŋot bë kɔ̈ɔ̈c.
Duk riɔ̈c, dɔ̈m mɛnhkui kök ku kääckë bï yom cï buɔk.

Yom dït apɛi, acï rot jɔt ara'mwër.
Yom adït apɛi aca ariɔ̈c ku kuat puɔl yic kuaath.
Adööc wun baai acie riɔ̈c, acie diɛɛr.
Wun baai acie riɔ̈c na cɔk bɛn ke dhoŋ tiim.
Na cɔk bɛn ke dhoŋ tiim, ke gir puɔl.
Na cɔk tiim dhoŋ ke yom puɔl acï yɔɔny cök.
Na cɔk yom rɔt ajɔt arämwër, ku tuk gir.
Na cɔk gir atuk ku juɛk yic, ka ŋot bï kɔ̈ɔ̈c.
Aŋot bï kɔ̈ɔ̈c, të dööt yen ror thɛɛr ye jɔ̈c nhom.
Na dööt ɣɛn – gɛn ror ye jɔ̈c nhom ka ŋot bë kɔ̈ɔ̈c.
Kääckë ku guɔ̈ŋkë gïr.
Kääckë ku guɔ̈ŋkë yom.
Guɔ̈ŋkë gir wek aa tim dït, tim la mei ril.

Kɛ̈rkieɛ̈ acï yom dhoŋ ku buɔk kek.
Kɛ̈r acï yom buɔk ku dɔ̈ŋ ɣa kääc.
Na cak döŋ, ɣa cïn kër, ɣa kääc ee rot.
Na cak döŋ ɣatök ke ɣɛn acï yom kɔŋ kuaath.
Ɣɛn acï kɔŋ riäu, ɣɛn bï guɔ juäk.
Adööc wun baai acie riäu.
Ɣɛn acï kɔŋ riäu, tim la mei ril acie riäu.
Ɣɛn ee tim la mei ril ɣɛn bï guɔ juäk.
Ɣɛn adööc wun baai cï rot kɔŋ liɛm
Ɣɛn cie riɔ̈c löŋ.
Ɣɛn ee wun baai, cie riɔ̈c löŋ.
Acïn kënë ɣa rɔk liep löŋ yic.

Malueth acï ɣɛn apiir ku waŋde ŋic.
Malueth acï ga ben kol, waŋde aca ŋic.
Waŋde ku apiɛɛrke aca ŋic, acï ɣa ben kɔl.
Na cɔk kër dhuɔɔny ëbën ke ɣɛn acïkɔŋ wïïk.
Na cɔk ɣa guɛ̈r kɔ̈u bei ke ɣɛn acï kɔŋ wïïk.
Na cɔk ɣa keer yiɛ̈ɛ̈p ke ɣɛn acï kɔŋ wïïk.
Na cɔk ɣa tuuny mac ke ɣɛn acï kɔŋ wïïk.

Dut Anyakdït