Agamlöŋ Online

Akɛ̈c akɛ̈c Nhialic.
Akɛ̈c akɛ̈c Nhialic.
Bɛn miëthku biɔ̈ɔ̈k ɣɔ̈ɔ̈m
Bɛn keek cɔl ayök dɔ̈ɔ̈r.
Bɛn ke yiëk puɔ̈th dɔ̈ɔ̈r.
Bɛn aliir waar.
Bɛn panda cɔl ayök dɔ̈ɔ̈r.

Alei acï rot kuɛ̈l wutic.
Go piny yic ciën dɔ̈ɔ̈r.
Alei acï mïth ë baai tuɔ̈ɔ̈m kɔ̈ɔ̈th.
Ku ye rot cɔl aye duŋɔ̈ɔ̈r.
Ku acï path bï alei mïth ë baai ŋɔ̈ɔ̈r.
Ku yen apaɣɔɔu.
Ye wun dït ŋa lëu bï cɔɔl.
Ku yen akuany baai yic.
Acïn tiɔm wun dït lëu bï nyooth.

Nhialic, arɔt arɔt.
Arɔt arɔt
Alei acï wël ɣɔɔm
Alei acï këriëëc ëbën juääk.
Käk ë yath acie bɛn theek.
E rin cï alei ciɛɛŋ liääp.
Kɔc wäär käk ë yath looi,
Keek aajɔl daai.
Rin cï agamlöŋ rot cɔl aye bɛ̈ny.
Kɔc wäär löŋ cɔɔl ke ye bäny ë baai,
Keek aacï baai.

Kiic kek bɛ̈ny anɛ̈k teer.
Ku ke riääk yen acï kek yiëk teer.
Acïn raan yic ben lueel.
Alei acï kɔc piɔ̈ɔ̈c lueth.
Ku ke yen acï ya muɔɔr-teer.

Akɛ̈c akɛ̈c Nhialic.
Akɛ̈c akɛ̈c Nhialic.
Ciɛɛŋdiɛ̈ acï riääk.
Yanhdiɛ̈ acï riääk.
Alɛi acä dhiäm të ɣɔ̈ɔ̈r.
Alɛi acä dɔ̈k ŋɔ̈ɔ̈ŋ.
Aacï keyiic mat manden,
Ku yekë ɣa guɔ̈t lɔ̈ɔ̈r.

Aa miëthkiɛ̈ peec,
Ku yekë ɣa mäc yanhden.
Ku acä gam ba yanhden door.
Yen acï yuɔmkiɛ̈ döŋ roor.
Ku na cɔk amën cï yuɔmkiɛ̈ dɔŋ roor,
Ka ŋuɔt ke bï Nhialic cool.

Ku na cɔk amën cï kuatdiɛ̈ ɣa koon,
Ku gamkë bï alei keek kool,
Ke Abukdït abï wëndɛn tök tooc.
Ku abï keek thiäi roor.
Të cɔk kek ke yiic mat ë manden,
Ka ŋuɔt ke cop roor.

Rin Madït akëc ɣa kaŋ koon.
Acïn raan cï muɔnyjäŋ kaŋ dhoor.
Aya lɛ̈k kɔc ë keek tooc.
Na ye yiɛnydiɛ̈ yen nɛ̈k ɣɛɛn.
Ka ŋuɔt bï Nhialic tɛk ɣook.

Muɔrwël Ater Muɔrwël