Agamlöŋ Online

Manh nyankäi akuc nɛ̈ɛ̈r.
Manh nyankäi akuc nɛ̈ɛ̈r.
Ruëëny dït paan ë nyankäi,
Kuc kek aciɛɛn näär.

Ruëëny dït paan ë nyankäi.
Aye ŋɛk rot wet kek man ku wun.
Ruëëny dït paan ë nyankäi.
Aye tik muɔnyde thiën awan.
Kuɔ̈c ciɛɛŋ paan ë nyankäi.
Aye ŋɛk rot ruëëny kek ë mɛ̈nhë.

Ruëëny dït paan ë nyankäi
Ruëëny dït ŋic wuɔ̈ɔ̈t.
Na cɔk a Nhialic acäŋ cak keek,
Ka ruëëny paan ë nyankäi.
Ruëëny dït paan ë nyankäi,
Acï kek nyïïn nyop.
Ku aacie röt moth.
Ruëëny kuc kek Nhialic
Acäŋ cak keek.

Ruëëny dït paan ë nyankäi.
Acïnic meth ku acïnic raan dït.
Acïnic tik ku acïnic moc.
Kɔc aa röt rïïr abï piny abiör!
Ruëëny dït paan ë nyankäi.
Aye ŋɛk pïïr ŋɛk.

Ruëëny dït paan ë nyankäi.
Aye Nhialic kuëëŋ cök lueth.
Acie röt dɔk lueth yiic.
Aa lueth kek acieŋ baai
Lueth ku yic acïn thook akeu.
Bɛ̈ny acït kïïc ku kïïc acït bɛ̈ny.
Paan ë nyankä, acïn yiic bɛ̈ny.

Ciɛɛŋ rɛɛc paan ë nyankäi.
Ee ciɛɛŋ cït ciɛɛŋ dhäk.
Këriëëc ëbën aye jai abï piny abiör.
Na wïc lueth ku jëijëi ë wël
Ke yï lɔɔr yathic.
Yanh paan ë nyankäi
Ee yanh kɔc piɔ̈ɔ̈c lueth ku ruëëny.

Paan ë nyankäi acïn yiic abɛ̈ɛ̈l.
Cuëër acie keek yiɔ̈ɔ̈r gup
Aye paan ë nyankäi wel
Bï ya muɔɔc.
Ruëëny dït paan ë nyankäi
Aye käk ë yath kual.
Ku kɔc acï riɔ̈ɔ̈c jɔŋ cï läm keek.
Aacie riɔ̈ɔ̈c Nhialic.
Aacï rin Nhialic lööm
Bï keek ya lim.

Nhialic dït paan ë nyankäi.
Ee Nhialic miëth.
Na wïc ba kuɛth,
Ke yï du rot gɔ̈u
Lɔɔr pan paan ë nyankäi.
Kɔc aa mïth rin ë Nhialic.

Pathuɔ̈udiɛ̈ ku yekë paan ë Nyankäi Acäi.
Ɛ̈i! guɔ̈p puɔ̈ɔ̈l Acäi nyankäi
Bï ye bɛ̈n yiëk raan cath.
Ruëëny dït mony ë nyankäi
Ee cï madït lac ŋic thɛɛr
Ku lëk wädït Deŋ Kak.

Acï Madït lueel, ‘Ye nyandiɛ̈ bï yiëk alen tem
    piny kɔ̈u, cï kɔc bï yiën anyon?’
Go Wädït cï piŋ
Ku gɛm Acäi nyankäi tënë alei
Madït ee cï puɔ̈u jiɛth
Wën cï yen alei tïŋ
Ke cath ke wäl cï la yënɔr
Mony ë nyankäi ee mac jɔŋden
Dɛ̈ɛ̈t ye wit gurno
Ku athek alau ku pɛɛi.
Go Madït ŋic lɔn cï alei rot kuɛ̈l wutic
Ku yen acï ya cäät
Ku kuɔ̈c ciɛɛŋ ku jakrac
Cï bɛ̈n muɔnyjäŋ yic.
Kuɔ̈c ciɛɛŋ ku jakrɛc mony ë nyankäi
Aya tïŋ paan ë nyankäi gup.

Paan ë nyankäi aacï jɔ̈k kuany
Malual ku Macär.
Tiɛ̈ŋkä röt apath, jɔ̈k dït paan ë nyankäi
Aacï lony yiëth.
Aa ɣa biɔ̈u, aacam ɣɛɛn.
Malual ku Macär
Aa tïŋ luɔi den.
Aa cï wën a nyankäi
Muɔɔc ë cuaai
Acie bɛn tɔ̈c.
Acie jɔ̈k cï rɛ̈ɛ̈c tɛ̈n awälä.

Ku jɔl macär ke teem ë rɛ̈ɛ̈c.
Ee kuan jöŋ cam apɛi.
Na cï muɔɔc ë cuaai,
Ka ŋɛɛny na cɔk a man yen yök,
Ka ciɛm thööŋ.
Kuat acol arac.
Ee yen ɣa kaŋ biöu,
Ku Malual ee tɔ̈c tëdeen.
Mäcär acït kë ye Malual tooc
Bï tuɔ̈c ɣɛɛn.

Ɣɛn ee gäi.
Të ye jöŋdä, jöŋdä tooc thïn.
Aa ke ye jɔ̈k wädït thɛ̈ɛ̈r.
Kuan alueel ee bïï ror liɛɛt
Ee jöŋ la guɔ̈p awan.
Ee ɣa biɔ̈u ku acie ɣëët ɣaguɔ̈p.
Ee na biɔ̈u Malual, ke Macär abɔ̈,
Cï ye yɔ̈l tööt ku acï ŋiiny abï nyin alual.

Kuat acol arac.
Na cï muɔɔc ë cuaai,
Ka tem kɔc kɔ̈ɔ̈th.
Ee kuat jöŋ thɛɛr,
Na cï muɔɔc ë cuaai,
Ka tïŋ luɔi de
Ku ee lac wäth të nɛ̈k cɔk yen.

Tiɛ̈tkä wenhïïm, jɔ̈k aacï wäth ë nïnkä.
Duɔ̈kkë macär cɔl akac week.
Duɔ̈kkë macär cɔl acam mïth,
Ku duɔ̈kkë nhïïm mär Malual.
Ee jöŋ la guɔ̈p awan.
Ala guɔ̈p kuith apɛɛi
Yakä ke muk nhïïm.
Na kuɔ̈c käröt tïŋ, ke macär acarn week,
Wɛ̈t ee jɔ̈kkä karou aril apɛi.
Ku jɔl macär malual bɛn wuɔ̈r ë rɛ̈ɛ̈c.
Këde yen ë jöŋ cool.
Na cï yiëk yuɔɔm,
Ka jɔl wäth bï mïth ë man ya cam.
Arac apɛi.

Duɔ̈kkë nhïïm mär macär.
Yakä muk nhom.
Macär arac, ee kuat jöŋ thɛɛr.
Duɔ̈kkë cɔl atuk week.
Wal aliu ku wiɛth aliu
Na kuɔ̈c käröt tïŋ,
Ke macär acam week.
Këde yen ë jöŋ cool.
Na cï muɔɔc ë cuaai,
Ka mär nhom bï mïth ë man kuc.

Tiɛtkä wenhïïm,
Jɔ̈k aacï lony yiëth.
Duɔ̈kkë keek cɔl acam week.
Aa jɔ̈k rɛc, ku jɔ̈l Macär ke teem thook ë rɛ̈ɛ̈c.
Kuat acol arac.
Kuat acol arac.

Muɔrwël Ater Muɔrwël