Agamlöŋ Online

Ɣɛn acä Ayak nhiaar aba ciët meth kek man.
Athuut ee cööt nyan Marial cï weŋ
Dhɛ̈ɛ̈ŋde ku wɛ̈lke aacï piändiɛ̈ gut nhom.

Meth aya tïŋ aba ŋëëu cï manh cï man bɛ̈n keny
Nhiërdiɛ̈ kek Ayak acä dɔm atïplïr
Atiëmdïɛ̈ kek atïm Ayak acï röt nhiaar
Abïk ciët këth ke ca
Alec kooth ee nya
Na moony yethok,
Ke ɣɛn adal ciët la wɛ̈t puɔth cï lɛ̈k ɣɛn
Ku ke dhɛ̈ɛ̈ŋde yen acä duaar puöu piny.

Meth, meth acï lec kuɔ̈c ɣɛr apɛɛi
Ba rot cak mat panden
Ba ya dɔl ke yen
Ee na tiëŋ Ayak të cɛth yen,
Ke piändiɛ̈ ala kuruum ku la nhom yoom
Ciët ɣa cï acäŋdiɛ̈ löny.

Nhiërdiɛ̈, nhiërdiɛ̈ ke Ayak
Na röök, ka pääc ɣa guöp bï ya yath
Ee na kɛ̈c Ayak bɛ̈n tïŋ,
Ke ɣɛn arɛ̈ɛ̈r ɣa cï nyin kuany
Ciët ɣa cï weŋ määr
Ku Ayak yen aya tak aba thuc.

Wɛ̈t Ayak ee ɣa yiëk ariɛɛr nhom
Cï tïŋ cï mony töny tɔk
Meth acä ŋic nyin apɛɛi
Rin Ayak acä ŋic thok
Ka luɛɛl Ayak.

Kën, kën Ayak acä rum puöu apɛɛi
Aŋuɛ̈ɛ̈n ba rot cak mat baai
Bï ɣok ya tooc ɣok Ayak.

Ayak nyan cï miɛt abï ciët adiɛny, kek aŋö!

Ɣɛn abï ya gurgur pan Ayak.
Na le kuany tiim, ka wat nhom.
Na le wïïr, ka wat nhom.
Na le dooŋ, ka wat nhom.
Na le pan piööc, ka wat nhom.
Na dïc mac, ka wat nhom.

Ɣɛn acï Ayak nhiaar aba ciët atïïk
Ke raanden ye rääk
Ayak nyan cït kuɛl ku akɔ̈l ku pɛɛi
Acie nyan yïk abɛ̈ɛ̈l kek apaɣɔɔu
Ku wën mäu tɛ̈ɛ̈r ke kɔc dït
Cuɔtkë rot wei, wek athël Ayak bul
Acie nyan yïk awadaa.

Ee na tiëŋ Ayak tiɛŋdiɛ̈
Ke ɣɛn amit puöu
Cï manh cï man tïŋ bï ya dier yethar piiny
Kën Ayakthi acï ɣɛn ye nin.
Aya lɛ̈k paan ë wä, ku acie lööny këpuɔ̈th
Kën Ayak abï ɣɛn rot nöök aba ciët tiŋ
Cï moc la kɛɛn.

Wɛ̈t Ayak thii acï ɣɛn nin.
Ee na tääc wakɔ̈u, ka pën ɣa nïn
Ciët ɣa cï kiɛth moc
Nhiërdiɛ̈ kek Ayak
Ee ɣa pɛ̈n nïn ba ruu rëër bï ɣa bäk
Cï wɛ̈t cï kɛ̈ɛ̈k wëu nhïïm
Bïk ruu gɔ̈th bï ke bäk
Cuɔtkë röt wei, acie nyan yïk dhäk
Meth acï lec aŋök ciët cie mith
Ku jɔl nyär cuɔl abï ciët col mac
Kuan jäŋ acie baai.

Ee ɣa kɛ̈ɛ̈t rölden cï la loplop
Wäär ciɛk aciëk ku teem
Röl Ayak ee ɣa dɔm nïn të jɛm yen ɣalɔ̈ɔ̈m
Ee na piɛŋ Ayak röl.
Ke ɣɛn amit puɔ̈u bï ciët aköl ɣɔn dhiëëth ɣɛɛn.
Meth acï la nɛ̈mnɛ̈n cïmën beek
Bɛ̈r Ayak acä tiiŋ puöu
Cï wën cï kɔc bät nyïïn rïŋ yic
Bï jäl ajam, nyɔk akoor ku tiŋ kɔc puɔ̈th.

Meth acï thok ayɛn ciët cie mïth
Ku jɔl thok akuur cï akuɛm aɣɔɔk
Dhëëŋ Muɔnyjäŋ acie baai
Meth Ayak na jɛm ɣalɔ̈ɔ̈m
Ke wɛ̈ikiɛ̈ apääc, ba ya rëër ɣa cï puöu
La loplop, cï wën cï kecuai cuat mɛɛc
Bï puöu ala juuc.

Ɣɛn athut alec weer, cï nyär acär cï col mac.
Dhëëŋ Muɔnyjäŋ acie baai
Meth acï nyär dukduk cï ciɛk kooth ku jän pɛɛi
Kuat Acol kek Ayak
Kek aye piändiɛ̈ biɔ̈ɔ̈k.

Ɣɛn thut alec rou cï miɛt, këc nhom määr ciɛɛŋ Muɔnyjäŋ.
Aya nhiaar nyan cït man.
Meth aye ŋic man. Athɛ̈ɛ̈k yen kën Muɔnyjäŋ.
Ɣɛn acie cööt mam
Kuan Jäŋ ku cɔk kur abï ciët aŋiic
Ka ŋuɔt cɔl riɛmdu puöu acie rëër tëdït tet.

Aya thut nyan cï wun dhiɛ̈ɛ̈th ku wëët
Ɣɛn cie thut ayuur
Ayak nyan cït beek ku wairial Nhialic.

Yen ee nyan cï piändiɛ̈ nhiaar
Aya cɔl akëc akɔl dhiaai
Meth acï wä nhiaar
Meth acï kuatdiɛ̈ ɣa yiëk nhiaam.
Acïn athun kɔŋ ɣa tiaam.
Ayak nyan adɔ̈l raan
Yen acï Majök nhiaar,
Ku buŋ Mabiör cï Majok thiaan
Kek aa lec Ayak ca nhiaar.
Dhëëŋ Ayak aye piŋ thiaai
Dhëëŋ Muɔnyjäŋ acie baai.

Muɔrwël Ater Muɔrwël