Agamlöŋ Online

Waidiɛ̈ ke Maröl jök
Ɣok anäk aciëëk d'it nhïm ë nyin
Ya tɔŋ nhom ku ya tɔŋ cök
Ater dɔm nhom cam ku cuëc
Raan dhäl ɣɛɛn acït raan dhäl
Mony ë man.

Yeŋö ca wööc Nhialic
Bï ɣɛn yalaaŋ ë Jäŋ
Yeŋö be wuɔ̈ɔ̈t ɣa dhɔ̈l
Yeŋö br wuɔ̈ɔ̈t ɣa jɔ̈l
Yeŋö cä kɛ̈ɛ̈k ke piny nhom
Ba thɔ̈r ke Dïŋklïth ku bɛn thɔ̈r
Ke wën ë nyankäi.

Acä cak ku tääu ɣɛn tuŋ thook
Kaam wɛ̈tkä ke wɛ̈tkä
Ku ben ɣa tääu ciɛl
Ba ya wuɔɔr ë raan col
Ɣɛn ee näär ë jäŋ ëbën
Ee dhääl yen acä ye pät
Të cɔk yen ɣa käk.
Na ye raan kuc ɣɛn
Ke kɔŋ Dïŋkl]]ïth thiëëc
Ku kɔŋ Tuliän thiëëc
Ku thiëëc mathir.

Ɣɛn ee Muɔnyjäŋ.
Ɣɛn ee Muɔnyjäŋ.
Ɣɛn ee mony ë jäŋ.
Ɣɛn amuɔ̈k jäŋ.
Muɔnyjäŋ, mony cie diɛɛr ater
Muɔnyjäŋ, mony cie riɔ̈ɔ̈c
Muɔnyjäŋ, mony cie nyin nyop
Muɔnyjäŋ, mony tɔŋ lam
Muɔnyjäŋ, mony tɔŋ dhuur
Muɔnyjäŋ, mony thou ŋɛɛny
Muɔnyjäŋ, mony thou nhiaar
Muɔnyjäŋ, mony thou nhiam
Muɔnyjäŋ, mony thou rin raan niɔp
Muɔnyjäŋ, mony rot gäm ater
Muɔnyjäŋ, mony cie metic ku tɛ̈ɛ̈u piny.

Ee yic, yen Muɔnyjäŋ nɔ̈k
Ee dhääl, yen Muɔnyjäŋ nɔ̈k
Ee pny, yen Muɔnyjäŋ nɔ̈k.

Acïn raan cï Muɔnyjäŋ kaŋ nɔ̈k bï dhoor.
Acïn raan cï Muɔnyjäŋ kaŋ nɔ̈k bï kök.
Acïn raan cï Muɔnyjäŋ kaŋ nyuɔ̈ɔ̈c piiny ëkök.
Acïn raan cï Muɔnyjäŋ kaŋ nyooth nyin.
Acïn raan cï Muɔnyjäŋ kaŋ pɛ̈n yiɛnyde.
Acïn raan cï Muɔnyjäŋ kaŋ pɛ̈n nhom lääude.

Yeŋa bä pɛ̈n nhom lääudiɛ̈
Yeŋa bä pɛ̈n yiɛnydiɛ̈
Yeŋa bä pɛ̈n yanhdiɛ̈
Yeŋa bä pɛ̈n piɛnydiɛ̈
Nhom lääudiɛ̈ aba lööm ë ciɛndiɛ̈.
Yiɛnydiɛ̈ aba lööm ë ciɛndiɛ̈.
Yanhdiɛ̈ aba tiit ë ciɛndiɛ̈.
Piɛnydiɛ̈ aba lööm ë ciɛndiɛ̈.

Atuel dït cï ɣa dar
Ee tëŋ cï ɣa tek yic ke kackiɛ̈
Buk röt agaany
Buk röt aɣaac
Buk röt alom
Buk röt anɔ̈k
Buk röt atil
Buk jakkua puɔ̈l
Buk piɛnyda puɔ̈l
Ku buk ŋɔ̈ŋ.

Acä bï gam.
Acä bï gam.
Alei acä bï puɔ̈l bä tek yic
Kek kackiɛ̈
Të cɔk yen ke wɛ̈l nyïïn ɣɛɛn.

Riɛmdiɛ̈n cï puk piny
Aï ya dɔ̈ɔ̈r ku nhom lääu raan col
Abï ya lɔ̈ɔ̈r ku ye miɛt puöu raan col
Thɔn dït ee nöök ëtɔ̈ piiny
Të eɔk ye dhur ë kuat kiith
Këda abë luk nhial ku piiny.

Ɣɛn ee muɔɔr atɛr
Ɣɛn acie riɔ̈ɔ̈c ë kɛɛr
Ater yen aya cool ë kërac
Të cïï ɣa nyuɔ̈th nyin kërac
Abï manh ë tik ɣa maan.
Bäŋ yen ee kë ya maan
Ɣɛn ee monydit na la wɛ̈t maan
Ku cɔk bɛ̈n cï tol maan
Ke yɛn acop ariɔ̈ɔ̈c abï rot maan
Alueeth aci ɣɛn wɛ̈lke maan.

Ɣɛn ee kɔc luɔɔp wut ci Maluil dit akɔ̈ɔ̈n
Ago ariɔ̈ɔ̈c dhuk ye akɔ̈ɔ̈n
Ago ariɔ̈ɔ̈c ye puöu ya thɔ̈ɔ̈ŋ
Ago ariɔ̈ɔ̈c tu ë laac
Na kë tïn miɛ̈thkiɛ̈ ɣaac
Acï mïth ë baai maan.

Du ben la wɛ̈l wɛ̈l
Këdun akëc rot kaŋ maan.
Ɣɛn acie riɔ̈ɔ̈c ë cuɔɔl
Näk raan cuai bï ɣɛn piny buɔɔl
Tɔŋ tuum Kon Anɔk
Go wai ya kɔ̈ɔ̈c cinën nɔk
Duk ben la wɛ̈l wɛ̈l
Duk nhom ben cääl
Yïn akëc kaŋ rɔ̈m ke wun ɣɛ̈ɛ̈c akät
Yïn yï ca puɔ̈l ba tät
Go kuatdu bɛ̈ɛ̈i baai aca mät
Ku kuɔ̈c lɔ̈n cï ɣɛn rot thɛ̈l dät
Këdun acä bï pät.

Ater acuk gɛ̈m pïu
Ater acie rop
Ater cït ater piny ke pïu
Ater acuk dhieth mïth
Ku abuk muɔ̈k mïth.

Yïn akëc anyaar kaŋ dɔm nhom.
Yïn akëc wädït kaŋ dɔm nhom.
Na ŋic ruɛ̈ɛ̈nydu diët acï dɔm nhom
Yïn acä yiɔ̈ɔ̈p yïn acä yök
Mɛɛth kiith akuany baai yic aacï röt yök
Ku yekë mïth ë baai yɔŋ bï ke yiëk ariöp
ku këden acä ye bɛ̈ɛ̈r ɣok aabï röt yök.

Ku piɛnydiɛ̈, piny ë wärkuandït
Acä bï puɔ̈l
Acä pɛ̈l alei
Ee piny cï Nhialic yiëk wärkuandït
Ku acïk nyäŋ ɣook
Piny ye ɣɛn tɔ̈c miök nhom
Ku cath dhääp nhom
Piny kuëër ca ku kuëër miök
Piny näk Kon Anɔk
Piny nak Ali Abdalatip Tokmac
Piny näk Ariääth Makuei
Ku nɛ̈k Deŋ ë Nhiaal
Ku nɛ̈k Mathiäŋ Ajuɔɔŋ
piny cï Muɔnyjäŋ nɔ̈k
Acie piny päl alei
Të cɔk alei ɣa thöl
Aŋuɛ̈n cï thök
Aŋuɔt bï thök
Na kën cak thök.

Riɛmdiɛ̈n cï puk piny.
Abï ya dɔ̈ɔ̈r ku nhom lääu raan col.
Abï ya dɔ̈ɔ̈r ku nhom lääu raan col.

Muɔrwël Ater Muɔrwël