Agamlöŋ Online

Ɣɛn abaar ayeth dɛ̈l
Ɣɛn ayeth dɛ̈l ë raan
Ku acä ye maan
Ee piny yen acï wä nyaai
Ku acï mïth ë ma nyaai
Ku acï wärkuandït nyaai
Aacï thou rin baai.

Ɣɛn ayeth dɛ̈l ë baai.
Ɣɛn adɔ̈ŋgöör ë baai.
Riäŋ cï kackiɛ̈ nyaai
Ba döŋ piny
Ɣa ye abaar
Acä ye maan
Meth aye dhiëëth
Bï thou rin baai
Muɔnyjäŋ acï thuɔu gam
Ku yen apath bi thou rïn baai
Bï kɔc kuc yic waar ë riɛmde
Aköl le kek nhom lääu yök
Acï Muɔnyjäŋ bï bɛn baai.

Muɔnyjäŋ acï nɔ̈k bï luɔ̈i akuut
Ku cuɛ̈ny ë ɣöt rin baai
Muɔnyjäŋ acï miëthke peec ku ɣɔɔcke wei
Ku nyɛɛi jɛɛk yeciin
Bï thou cɔk ku lɛɛŋ
Ku aa rin baai.

Raan cï thou rin baai
Acie kɔc muɔ̈r nhïïm
Ku acïn raan ye baai.

Riäŋ wäär nyɛɛi Wadït Ayuël ë Baak
Ku nyɛɛi William Deŋ ë Nhiaal
Ku keek aa mïth ë baai
Abï yanhom lääu tënë kɔc yic baai
Riäŋ cï kɔckiɛ̈ndït nyaai
Ku ben miëthkiɛ̈ nyaai
Ku ben miethkiɛ̈ nyaai
Acä ye maan
Ɣɛn adɔ̈ŋgöör ë baai
Meth aye dhiëëth bï thou rin baai.

Rim ë Deŋ Nhiaal kek nɛ̈ɛ̈r Ayuël ë Baak
Aabï kek ke baai waar
Ku abï ya nhom lääu tënë kɔc yic baai
Adhëŋ aa path bïk thou rin baai
Muɔnyjäŋ apath bï ya yen thou rin ë baai
Bï yic bɛ̈ɛ̈l tënë kɔc yic baai.
Aköl le kek nhom lääu yök
Aacï Muɔnyjäŋ bï bɛn baai.

Muɔrwël Ater Muɔrwël