Agamlöŋ Online

Yeŋa ba wɛ̈l ɣakɔ̈u
Yeŋa ba wɛ̈l ɣakɔ̈u
Yeŋa bï kɔ̈ɔ̈c ɣakɔ̈u
Yeŋa ba wɛ̈l ɣakɔ̈u.

Na tiëŋ cam ku cuëc,
Ka cïn raan kääc ke ɣɛɛn.
Na liɛɛc ɣakɔ̈u ku ɣanhom,
Ka cïn raan, kääc ke ɣɛn.
Kuatdiɛ̈ adaai të nɛ̈k alei ɣa thïn
Apirika acä wɛ̈l yekɔ̈u.

Yeŋö cï wuɔ̈ɔ̈t ɣa maan
Yeŋö cï wuɔ̈ɔ̈t ɣa maan
Kɔc wäär bïï yanhden
Aa kääc roor të mec
Ku alei anɛ̈k ɣa yanhden.
Yeŋö ye wuɔ̈ɔ̈t yethok mat
Bïk ɣa cɔl adhur kuat ce thok mat.

Yeŋö ye alei lɔ̈ɔ̈r yupic
Yeŋo yen lɔ̈ɔ̈r guɔ̈t köök
Yeŋo ye alei ɣa guɔ̈t pïny wakɔ̈u.
Acï weŋ peec ku peec thɔ̈k
Acï Deŋ peec ku peec Nyankiir
Adhur ɣɛn ke wämäth akën
Ku kɔc ken ye kek yanh tök theek
Ku acïn raan kony ɣɛɛn.

Yeŋa ba wɛ̈l ɣakɔ̈u
Yeŋa ba wɛ̈l ɣakɔ̈u
Apirika, acä wɛ̈l yekɔ̈u
Acä päl alei.
Bï alei ɣa näk bɛɛŋ
Ku ke yic yen anɛ̈k ɣɛɛn
Yiny wïc ɣɛn piɛnydiɛ̈.

Aŋic pinynhom lɔc cï Muɔnyjäŋ thuɔu gam
Ku thou atɛɛr ke pïïr
Na bɔ̈ piɛnydiɛ̈ bei
Ke Nhialic abä bɛn cuɔ̈ɔ̈t
Köŋ cuëëc ë Deŋ Abuk
Aba bɛn cuɔ̈ɔ̈t
Ku abä wɛ̈ɛ̈r bei.
Yic acie tiaam
Yic acie thou
Cɔk run bɛ̈ɛ̈n Loŋär bɛ̈n
Ke Nhialic abä bɛn cuɔ̈ɔ̈t.

Acïn të liu yuɔmkiɛ̈ thïn
Yïn kiir ɣer ku kiir col
Cäk ɣa päl alei
Cäk ɣa päl alei
Yeŋa cït ɣɛɛn
Yeŋa cï yɔŋ yaaŋ yic buɔɔt
Ɣɛn acï cuäny ɣöt ke miëthkiɛ̈
Arak thiäär.
Ɣɛn acï nɔ̈k bï ɣa luɔ̈i akuut
Ku acïn raan cï alei thiëëc.

Kɔc ë pinynhom kɔc tɛ̈k yiith
Cäk la dë
Cï alei week dɔ̈m määth
Na week kɔc ye ɣok, ke yanh tök theek
Cï alei week ɣɔɔc
Na cäk jai Jesu,
Ke ɣok aabï rɔ̈m pan nhial ë Kristo.

Muɔrwël Ater Muɔrwël