Agamlöŋ Online

Yïn acä bï gɔ̈k.
Yïn acä bï gɔ̈k.
Ɣɛn acï alei bï gɔ̈k.

Të cɔk yïn ɣa that ku mac ɣɛn
Ku ɣaac ɣa wei,
Ke yïn acä bï gɔ̈k
Ee wädït raan nyuucyïïn
Yen aba ya gɔ̈k.

Na cï wädït ythok gäm yïïn
Ke ɣa këc nyin kuɛk
Ku ba döŋ piny ke ɣa ya aluɔnydu
Ke yïn acä bï gɔ̈k
Ee wädït raan nyuuc yïïn
Yen aba ya gɔ̈k.

Të cɔk yïn ɣa yɔŋ aköl ku wɛ̈ɛ̈r
Erïn cï ɣɛn jai ciɛɛŋdu ke yanhdu
Ke yïn acä bï gɔ̈k
Ee wädït raan nyuuc yïïn
Yen aba ya gɔ̈k.

Na cï nyuɔ̈ɔ̈c ku tïït rot
Diët yïn akëc nyin tëk tënë ɣɛɛn
Roor kek piny aacï thiäŋ yuɔmkiɛ̈
Ku ba ya gäk ɣa cï la guarar kek acuth.
Piny nɛ̈k wur ku le ɣöt moor
Abï wädït jal daai kä looi alei tënë ɣok.
Lër kek abaar aacï nyïïn kuany
Rin cï alei rot cɔl aye wunden.
Na cɔk alei ɣa luoi kuith
Ke ɣɛn acï alei bï gɔ̈k
Ee wädït raan nyuuc yeen
Yen aba ya gɔ̈k.

Na këc alei bɛ̈ɛ̈i ku yïk nyande
Diët yanh alei akëc liääp ke yandhdiɛ̈
Wädït acï alei bɛ̈ɛ̈i ku mɛt yïïk nhïïm
Yïïk ë Deŋdït.
Bï alei të ye Deŋdït duɔɔr thïn tïŋ
Acï atïïp ë kɔc dït puöth riääk
Ku thiäikë wei yïïk nhïïm
Yïïk ë Deŋdït.
Atïïp ë wärkuandït aacï puöth riääk
Rin cï alei käk ë yath lɔ̈ɔ̈u yiic
Ku kɛ̈c tiop ë kɔcdït nhïïm
Ku acï guöp thiäŋ akɔr.

Na cɔk atïïp wärkuandït puöth riääk
ku pɛ̈lkë ɣa wei,
Ka cä bï gɔ̈k
Ku ɣɛn acï alei bï gɔ̈k
Ee wädït raan nyuuc yeen
Yen aba ya gɔ̈k.

Yeŋö kën bïï alei yïïk nhïïm
Ku bï alei ya lam götgöt
Deŋdït akëc kaŋ tɔ̈c gumo
Të lɛm yen Nhialic.
Deŋdït ee pïu wɛɛr nhial
Ku bï aliɛr bɛ̈n
Ku bï wei ë weŋ ke raan pïïr.
Deŋdït aŋic dït Nhialic thɛɛr
Na cï kë rac bɛ̈n,
Ku bï baai ya cath ke diɛɛr
Ka cɔl Nhialic këlɛn ë Jäŋ thɛɛr
Deŋdït acie Nhialic kiiu cïmën lɔ̈ɔ̈r
Nhialic ë Deŋdït, ee Nhialic ë dɔ̈ɔ̈r.
Deŋdït ee lm lɛ̈m cïn yic ruëëny.
Deŋdït ee Nhialic rɔ̈ɔ̈k ë tök.
Të nɛ̈k yen yïïk nhïïm
Të muɔɔc yen atïïp ë wärkuandït
Na muɔɔc Nhialic,
Ka rɛɛk ca ajïïp yiic
Ku cëpke yïïk nhïïm
Yïïk ë Deŋdït.
Kën bïï alei yïïk nhïïm
Bï alei të ye Deŋdït duɔɔr thïn tïŋ.
Acï atïïp ë kɔcdït puöth riääk
Ku thiɛ̈ikë wei yïïk nhïïm
Yïïk ë Deŋdït.
Na cɔk atïïp kɔcdït puöth riääk
Ku pɛ̈lkä ɣa wei.
Ka cä bï ɣɔ̈k
Ku ɣɛn acï alei bï gɔ̈k.
Ee wädït raan nyuuc yeen.
Yen aba ya gɔ̈k.

Na kɔc ye la pïïr piny,
Diët wädït ajɔl daai
Etë cï alei ɣo tuɔ̈ɔ̈m kɔ̈ɔ̈th thïn.
Alei acä tuɔ̈ɔ̈m kɔ̈u kek mïth ë ma.
Aacï alei wel thook ku wëlke nyïïn ɣɛɛn
Bïk ɣɛn aatïŋ ku ŋuankë kethook
Diëtke lɔc ɣa yäth ku bï ke yiëk kën këden,
Ku keek aa mïth ë Deŋdït.
Aya lɛ̈k keek
Duɔ̈kkë alei ye kiëët thok
bäk kä ye alei ke ɣa lat
Ya ber yiic.
Mïth ë tïk ku cɔkkë puɔ̈k
Ka la mat dït amook.
Alei acɔl alei
Ku wämuuth acɔl wämuuth
Calkä ya alei yen ɣa lat
Kë wiëc aŋiɛckë ku aŋic alei
Yakë mïth kek alei ku tiɛtkë wenhïïm
Ee yen tëwäär duɛ̈ɛ̈ŋ yen ke wädït thïn.
Ee nɔk ciɛɛk yïnhom
Na le nyuän bei, ka ciik yïkɔ̈u.
Yakë mïth kek alei, ku duɔ̈kkë yuɔɔmdiɛ̈ kac thok
Dhiëëth ee täu yuɔɔm yic
Yakä mïth kek alei ku duɔ̈kkë röt cɔl arät
Atïïp aadaai week.
Duɔ̈kkë röt cɔl abï atïïp ë kɔcdït lieec
Week aa läny ë Deŋdït,
Ee riääk yen acï we nyaai ɣo yiic.

Na cɔk ɣo rɛɛc ku gam alei
Bï ya wämuuth
Ke yïn aŋuɔt yï bï piny bɛ̈ɛ̈i
Të cï lamdu thiɔ̈k thïn.
Adhɛ̈ŋ ee dier cï yekɔ̈u wɛl wuɔ̈nden.
Wuɔ̈ndun acɔl wuɔ̈ndun
Wuɔ̈ndun cuet yïn arou nyööt
Wuɔ̈ndun cuet yïn apɛt ke yï kääc
Wuɔ̈ndun wit yï thïn,
Ku cï yï boŋ.

Na cɔk alei ɣa tuɔ̈ɔ̈m kɔ̈u
Kek mïth ë ma,
Ke mïth ë ma acä bï gɔ̈k
Ku ɣɛn acï alei bï gɔ̈k.
Ee wädït raan nyuuc yeen
Yen aba ya gɔ̈k.

Madït Nyan Kiir, acï ye yic duut wïïn
Adɔ̈ŋgöör töŋ ë nyaande
Acï thɔ̈rɔ̈l bɛn nyaai wäraköl.
Madït ee rot yuɔ̈p piny ku dhiɛɛu
Adhur mïthken cï peec
Adhur mïyhken cï aduɔnykɔ̈u nɔ̈k
Acï yic ŋɛɛr
Rin acïn kë cï bɛn döŋ tënë yeen.
Paande acï thok jal guɔ̈ɔ̈r
Acïn thɔ̈k, acïn ajïth ku acïn weŋ
Ee riäŋ cï baai thuum
Ee riäŋ kuc thuɔ̈ɔ̈m
Ee riäŋ kuc juɔ̈l
Acïn jöŋ röl ku acïn ajïth röl
Awet marial kek apaŋuɛ̈t kek adhiau baai
Baai acï thök
Ku ɣɛn acï alei bï ɣɔ̈k
Ee wädït raan nyuuc yeen
Yen aba ya gɔ̈k.

Muɔrwël Ater Muɔrwël